Xəbərlər

“ABAD” Çay Festivalında iştirak edir

Oktyabrın 12-dən etibarən Dənizkənarı Milli Park ərazisində keçirilən Çay Festivalında “ABAD” publik hüquqi şəxs öz stendi ilə təmsil olunur.Dənizkənarı Bulvar İdarəsinin təşkilatçılığı ilə baş tutan festivalın əsas məqsədi Azərbaycanın zəngin çay mədəniyyətini və milli ənənələrini tanıtmaq, yerli istehsalçıların fəaliyyətini təşviq etmək, eləcə də çay süfrəsi ətrafında formalaşmış qonaqpərvərlik dəyərlərini yaşatmaqdır.Festival çərçivəsində fəaliyyət göstərən “ABAD” stendində ailə təsərrüfatları tərəfindən istehsal olunan çeşidli qida məhsulları, o cümlədən Azərbaycanın müxtəlif bölgələrinə məxsus çaylar, təbii bal və mürəbbələr ziyarətçilərə təqdim edilir.Bununla yanaşı, stenddə “ABAD”çı sənətkarların əl işləri, milli ornamentlərlə işlənmiş suvenirlər, dekorativ-tətbiqi sənət nümunələri və çay mədəniyyətini əks etdirən müxtəlif məhsullar nümayiş olunur. Ziyarətçilər yerli istehsal və sənətkarlıq nümunələri ilə yaxından tanış olmaq, həmçinin bəyəndikləri məhsulları əldə etmək imkanı qazanırlar.“ABAD”ın festivalda iştirakı ailə təsərrüfatlarının və sənətkarların məhsullarının daha geniş auditoriyaya təqdim olunmasına, yerli istehsalın təşviqinə və milli sənətkarlıq ənənələrinin tanıdılmasına xidmət edir.Qeyd edək ki, Dövlət Kukla Teatrının yaxınlığında təşkil olunan Çay Festivalı oktyabrın 18-dək davam etməklə hər gün saat 12:00-dan 23:00-a qədər ziyarətçilər üçün açıq olacaq. Festivala giriş sərbəstdir.

13.10.2026

“ABAD” publik hüquqi şəxsin yaradılmasının 10 illiyi qeyd olunub.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan “ABAD” publik hüquqi şəxsin yaradılmasının 10 illiyi ilə əlaqədar tədbir keçirilib.Tədbirdə Dövlət Agentliyinin sədri Ülvi Mehdiyev “ABAD”ın 10 illik fəaliyyəti ərzində ailə bizneslərinin inkişafı, məşğulluğun artırılması və yerli məhsulların bazara çıxış imkanlarının genişləndirilməsi istiqamətində əldə olunan nəticələri qeyd edib, qurumun əməkdaşlarını yubiley münasibətilə təbrik edib.“ABAD” publik hüquqi şəxsin direktoru Rüfət Elçiyev qurumun 10 illik fəaliyyətinin nəticələri ilə bağlı çıxış edib. Bildirilib ki, 2016-cı ildə Masallıda pilot layihə kimi fəaliyyətə başlayan “ABAD” ötən müddət ərzində 723 ailə biznesinə dəstək göstərib. Onlardan 542-si sənətkarlıq, 156-sı qida istehsalı, 25-i isə digər sahələrdə fəaliyyət göstərir.“ABAD”çıların istehsal etdiyi məhsulların satış həcmi 20 milyon manata çatıb.“İdeyadan rəflərə” prinsipi ilə fəaliyyət göstərən “ABAD” ailə bizneslərinə biznes-planlaşdırma, brendinq və dizayn, hüquqi və mühasibat dəstəyi, sertifikatlaşdırma, logistika və satışın təşkili üzrə kompleks xidmətlər göstərir.Ötən 10 il ərzində “ABAD” məhsullarının satış imkanları da genişləndirilib. Məhsullar “ABAD” etno-butikləri ilə yanaşı, müxtəlif supermarket şəbəkələrində və onlayn platformalarda istehlakçılara təqdim olunur. Eyni zamanda yerli və beynəlxalq tərəfdaşlarla əməkdaşlıq çərçivəsində mikro və kiçik sahibkarların inkişafına, milli sənətkarlıq ənənələrinin qorunmasına və yeni məhsulların bazara çıxarılmasına yönəlmiş layihələr həyata keçirilib.Tədbir çərçivəsində “ABAD”ın 10 illik fəaliyyətini əks etdirən videoçarx nümayiş olunub, xidməti fəaliyyətində fərqlənən əməkdaşlar, eləcə də fəaliyyəti və uğurları ilə seçilən “ABAD”çılar təltif ediliblər.“ABAD” publik hüquqi şəxs Azərbaycan Respublikasının Prezidenti İlham Əliyevin 23 sentyabr 2016-cı il tarixli Fərmanı ilə yaradılıb. Qurum ailə əməyinə əsaslanan mikro, kiçik və orta sahibkarlığın inkişafı, məşğulluğun artırılması, regionlarda sahibkarlığın təşviqi və yerli məhsulların bazara çıxış imkanlarının genişləndirilməsi istiqamətində fəaliyyət göstərir.

23.09.2026

“ABAD” “YAŞAT” düşərgəsində şəhid övladları üçün ustad dərsləri təşkil edib

Lənkəran şəhərində keçirilən 5-ci “YAŞAT” düşərgəsi çərçivəsində “ABAD” publik hüquqi şəxsin sənətkarları tərəfindən şəhid övladları üçün müxtəlif istiqamətlər üzrə ustad dərsləri təşkil olunub.7 həftəni əhatə edən proqram çərçivəsində “ABAD”ın sənətkarları tərəfindən dekorativ-tətbiqi sənət, dulusçuluq, rəngkarlıq, ebru sənəti və digər yaradıcılıq istiqamətləri üzrə interaktiv ustad dərsləri müntəzəm olaraq təşkil olunub. Uşaqlar bu məşğələlərdə müxtəlif əl işləri hazırlayaraq yaradıcılıq bacarıqlarını inkişaf etdirib, milli sənət nümunələri ilə yaxından tanış olub və asudə vaxtlarını səmərəli keçiriblər.Qeyd edək ki, 5-ci “YAŞAT” düşərgəsi “YAŞAT” Fondunun və “ASAN Könüllüləri” Təşkilatının birgə təşkilatçılığı, “TABİA Group” və “Lankaran Springs Wellness Resort” hotelinin tərəfdaşlığı ilə təşkil olunub.

03.08.2026

“ASAN AI Hub” növbəti çağırış üzrə qalib həll müəyyən edib

Ölkəmizin açıq innovasiya platforması olan “ASAN AI Hub” və “ABAD” publik hüquqi şəxs arasında əməkdaşlıq çərçivəsində elan edilmiş süni intellekt həlli üzrə çağırışın qalibi müəyyən edilib.“ABAD”ın “Brendinq Platforması” mövzusu üzrə çağırışın qalibləri Fuad Bağıyev və Fatimə Bağırova seçiliblər.Çağırışlar çərçivəsində ümumilikdə 12 innovativ həll təqdim olunub. İlkin qiymətləndirmə mərhələsinin nəticələrinə əsasən hər həll üzrə ən yüksək nəticə göstərən 5 iştirakçı növbəti mərhələyə vəsiqə qazanıb.Bu təşəbbüs “ABAD” məhsullarının brendləşdirilməsi, etiketlənməsi və dizayn proseslərinin süni intellekt vasitəsilə daha səmərəli idarə olunmasına yönəlib.Yekun mərhələdə isə çağırış üzrə bir qalib komanda 3000 AZN məbləğində mükafat ilə təltif olunub.“ASAN AI Hub” platformasının əsas məqsədi Azərbaycanda süni intellekt sahəsində fəaliyyət göstərən tədqiqatçıları, dövlət qurumlarını, özəl sektoru və fərdi istifadəçiləri vahid rəqəmsal mühitdə bir araya gətirməkdir. Platforma açıq innovasiya modelini təşviq edərək dövlət, biznes və təhsil müəssisələri arasında effektiv əməkdaşlığı gücləndirir.Platforma üzərindən real texnoloji problemlər açıq şəkildə elan olunur və tələbələr, universitet və elmi müəssisələrin nümayəndələri, sahibkarlar, eləcə də ictimai təşkilatlar həlləri ilə müraciət edərək mükafat fondu uğrunda rəqabət aparmaq imkanı əldə edirlər.Ətraflı məlumat üçün: https://asanhub.ai/

24.06.2026

700-cü sahibkar “ABAD”çı adını qazandı

“ABAD” publik hüquqi şəxsin dəstək göstərdiyi ailə bizneslərinin sayı artmaqda davam edir. 700-cü sahibkar Lənkəran rayonunda fəaliyyət göstərən “İnci Çay” brendinin təsisçisi Xəyalə Abdullayevadır.“İnci Çay” brendi Azərbaycanın qədim çayçılıq ənənələrini yaşadaraq Lənkəranda yetişdirilən yüksək keyfiyyətli çay yarpaqlarından hazırlanan məhsulları istehlakçılara təqdim edir. Ənənəvi üsullarla emal olunan çaylar özünəməxsus ətri, dadı və keyfiyyəti ilə seçilir. Brend yerli çayçılıq ənənələrinin qorunub saxlanılmasına və bölgənin kənd təsərrüfatı potensialının tanıdılmasına töhfə verir. “ABAD” sıralarına qoşulması münasibətilə 700-cü “ABAD”çı Xəyalə Abdullayevaya İçərişəhərdə fəaliyyət göstərən “ABAD” etno-butikində “ABAD” publik hüquqi şəxsin direktor müavini Vüsal Arzumanlı tərəfindən sertifikat təqdim edilib. Burada həmçinin “ABAD”ın fəaliyyəti, sahibkarlara göstərilən dəstək mexanizmləri və “İnci Çay” brendinin məhsulları haqqında məlumat təqdim olunub. “ABAD” ailə bizneslərinin inkişafına dəstək göstərməklə yerli istehsalın təşviqinə və regionlarda sahibkarlığın genişlənməsinə töhfə verməyə davam edir.

17.06.2026

“ABAD” Çövkən üzrə II Dünya Çempionatında sərgi-satış stendi ilə təmsil olunub.

7–14 iyun tarixlərində Binə Atçılıq Mərkəzində keçirilən Çövkən üzrə II Dünya Çempionatı çərçivəsində “ABAD” sərgi-satış stendi ilə təmsil olunub.Tədbir müddətində “ABAD”çıların istehsal etdiyi müxtəlif sənətkarlıq məhsulları ziyarətçilərə təqdim edilib. Bununla yanaşı, Nardaran “ABAD” Keramika və Tətbiqi Sənət Mərkəzinin ustaları tərəfindən keramika - dulusçuluq üzrə ustad dərsləri təşkil olunub.Qeyd edək ki, çempionatın qaliblərinə təqdim olunan kubok Nardaran “ABAD” Keramika və Tətbiqi Sənət Mərkəzində hazırlanıb.