Xəbərlər

Azərbaycandan ilk brend “Trendyolda”

“ABAD” publik hüquqi şəxs Orta Şərq və Mərkəzi Avropanın ən böyük onlayn ticarət platforması olan “Trendyol” ilə əməkdaşlığa başlayıb. Belə ki, biznes-ekosisteminə müsbət təsir göstərmək və rəqəmsal inkişafa dəstək olmaq məqsədi ilə Türkiyədəki mikro, kiçik və orta sahibkarlıq subyektlərinin, həmçinin sənətkarların məhsul və əl işlərini Türkiyənin hər yerində, hətta digər ölkələrdə müştərilərə çatdıran platforma artıq təcrübəsini ölkəmiz ilə də paylaşacaq. Bu istiqamətdə atılan ilk addım isə "ABAD" – Ailə Biznesinə Asan Dəstək – məhsullarının platformaya daxil edilməsi oldu. “ABAD” Trendyol-da təqdim olunan ilk Azərbaycan brendi kimi Azərbaycanlı qida istehsalçılarının və sənətkarlarının əl işi məhsullarını Trendyol-dan bütün dünyaya satacaq. Hazırda pilot xarakter daşıyan bu layihə çərçivəsində kiçik miqdarda “ABAD”çı məhsulları Türkiyəyə ixrac olunub və ixrac həcminin gələcəkdə genişləndirilməsi nəzərdə tutulur. Platformada satışa təqdim olunan məhsullarımız ilə tanış olmaq üçün axtarış panelinə “ABAD” yazmağınız kifayətdir.

30.11.2023

"ABAD” Mərakeşin nümayəndə heyəti ilə görüşdü

21 Noyabr 2023-cü il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxsin nümayəndə heyəti və ölkəmizdə səfərdə olan Mərakeşin Həmrəylik, Sosial İnteqrasiya və Ailə Nazirliyinin Qadınlar üzrə direktoru xanım Salma Tazi arasında 7 Saylı Bakı “ASAN Xidmət” mərkəzində görüş keçirilib. Görüşün əsas məqsədi Mərakeşin dövlət qurumları ilə “ABAD” arasında effektiv təcrübə mübadiləsi və müvafiq istiqamətlər üzrə mümkün əməkdaşlıq perspektivlərinin müzakirəsi olub. Qonağa “ABAD” publik hüquqi şəxsin yaradılması məqsədləri, fəaliyyət istiqamətləri və gördüyü işlər barədə ətraflı məlumat verilib. Qeyd olunub ki, mikro, kiçik və orta sahibkarlığın inkişafı baxımından “ABAD” modelinin yaradılması ilə bir çox nailiyyətlər əldə olunub. Qonağa həmçinin “ABAD”ın həyata keçirdiyi fəaliyyət, layihələr, həmçinin məhsullar barədə təqdimat edilib. Sonda isə “ABAD”çılar tərəfindən hazırlanan xatirə hədiyyəsi təqdim olunub.

21.11.2023

“ABAD”çılar Yapon ənənəvi sənətkarlığı ilə yaxından tanış oldular

Məşhur sənətkar Mami Takahaşi Yaponiyasevərlər və “ABAD”çılar üçün Yaponiyanın ənənəvi sənət texnikalarının təqdimatını keçirib. Tədbir “ABAD” publik hüquqi şəxs və Yaponiyanın Azərbaycan Respublikasındakı Səfirliyinin birgə təşkilatçılığı ilə 7 Saylı Bakı “ASAN Xidmət” Mərkəzində 17 noyabr 2023-cü il tarixində baş tutub. Tədbirin məqsədi ənənəvi sənətkarlığın təbliği və populyarlaşdırılması, sənətkarlıq üfüqlərinin genişləndirilməsi və təcrübə mübadiləsidir.Tədbiri “ABAD” publik hüquqi şəxsin direktoru cənab Rüfət Elçiyev və Yaponiyanın Azərbaycan Respublikasındakı fövqəladə və səlahiyyətli səfiri cənab Cuniçi Vada açıq elan ediblər. Daha sonra xanım Takahaşi ənənəvi Yaponiya sənətləri – Kintsugi və Mokuhanga sənətləri üzrə təqdimat və master-klasını keçirib.Tədbir zamanı yapon sənətlərinin tarixi və fəlsəfəsi haqqında da geniş məlumat verilib. Qeyd edilib ki, Kintsugi sənəti qırılmış əşyaların, keramika qablarının qızıl tozundan istifadə edərək birləşdirilməsi və əvvəlkindən daha gözəl hala gətirilməsi sənətidir. Bu sənət növü qüsurların mükəmməlliyini kəşf etmək, qırılmanın əslində bir son deyil, yenidən mövcud olma, yeni həyata bir başlanğıc ola biləcəyini göstərir.Mokuhanqa isə ənənəvi yapon taxta blok çapı sənəti olub, su əsaslı xüsusi boyalardan istifadə olunan ksiloqrafiya sənətidir. Bu, eyni zamanda məşhur yapon qravür sənəti “Ukiyo”nun da əsasında duran incəsənət növüdür. Qərb dünyasında istifadə olunan taxta blok çapından fərqli olaraq, yağlı boyalardan deyil, məhz su əsaslı təbii boyalardan istifadə olunur və çoxsaylı rəng seçimi vardır.Tədbir sual-cavab sessiyasi ilə yekunlaşıb.

20.11.2023

Bizi birləşdirən mədəni əlaqələr

“ABAD” publik hüquqi şəxs və Yaponiyanın Azərbaycan Respublikasındakı Səfirliyinin birgə təşkilatçılığı ilə Yaponiyalı sənətkar Takahaşi Maminin ənənəvi sənət texnikaları üzrə ustad dərsləri keçiriləcək.Master-klas Kintsugi və Mokuhanga sənətlərinin nümayişini özündə əks etdirəcək. Kintsugi sənəti qırılmış əşyaların, keramika qablarının qızıl tozundan istifadə edərək birləşdirilməsi və əvvəlkindən daha gözəl hala gətirilməsi sənətidir. Dərin fəlsəfi anlam daşıyan sənət növü qüsurların mükəmməlliyini kəşf etmək, qırılmanın əslində bir son deyil, yenidən mövcud olma, yeni həyata bir başlanğıc ola biləcəyini göstərir.Mokuhanqa isə ənənəvi yapon taxta blok çapı sənəti olub, su əsaslı xüsusi boyalardan istifadə olunan ksiloqrafiya sənətidir. Bu, eyni zamanda məşhur yapon qravür sənəti “Ukiyo”-nun da əsasında duran incəsənət növüdür. Qərb dünyasında istifadə olunan taxta blok çapından fərqli olaraq, yağlı boyalardan deyil, məhz su əsaslı təbii boyalardan istifadə olunur və çoxsaylı rəng seçimi vardır.Ustad dərsləri “ABAD”çılar və digər həvəskarlar üçün 17 noyabr 2023-cü il, saat 19:00-da, 7 Saylı Bakı “ASAN Xidmət” Mərkəzinin Konfrans Zalında baş tutacaq. Qeyd edək ki, iştirak üçün onlayn qeydiyyat mütləqdir. Qeydiyyat üçün bu linkə müraciət ediə bilərsiniz.

13.11.2023

“ABAD” məhkumların əməyə cəlb olunmasında iştirak edəcək

“ABAD” publik hüquqi şəxs və Ədliyyə Nazirliyinin Penitensiar xidməti birgə iş birliyinə start verdilər.İş birliyinin məqsədi məhkumların islah prosesinin təkmilləşdirilməsi, peşə biliklərinin artırılması, ictimai faydalı əməyə cəlb olunması, cəzaçəkmə müəssisələrində mövcud istehsal sahələrinin bərpası, yeni sahələrin yaradılmasıdır.İlkin mərhələ olaraq 2023-cü il oktyabrın 31-i “ABAD” publik hüquqi şəxsin əməkdaşları 4 və 15 saylı cəzaçəkmə müəssisələrinə baş çəkərək orada yaradılmış yeni istehsalat sahələri ilə tanış olublar, məhkumların əl işlərinə nəzər yetiriblər. Görüşün yekunu olaraq məhkumların əl işlərinin “ABAD” etno-butiklərində satışa çıxarılması mövzuları müzakirə olunub.

07.11.2023

Şəki “ABAD” Keramika və Tətbiqi Sənət Mərkəzi Avstraliya mediasında

Avstraliyada nəşr olunan və keramika aləmində böyük nüfuza sahib olan İncəsənət və Humanitar Sitatlar İndeksli (AHCI) “Ceramics: Arts + Perception” jurnalında Azərbaycanda Keramika Sənəti və “ABAD” haqqında geniş məqalə dərc olunub. Məqalə Süleyman Dəmirəl Universiteti Tətbiqi Keramika və Araşdırma Mərkəzinin Rəssamlıq Fakültəsi - Keramika və Şüşə kafedrasının müdiri, Dosent Serap Ünal tərəfindən hazırlanıb. Serap Ünal 2019-cu il may ayının 21-i Şəki "ABAD" Keramika və Tətbiqi Sənət Mərkəzində baş tutmuş "Təbiətdən Tarixə" adlı Keramika üzrə ilk Beynəlxalq Simpoziumun ayrılıqda 15 ölkəni təmsil edən 25 iştirakçısından biri olub. O, həm Azərbaycan və həm də “ABAD” barədə yaranan yüksək təəsüratlarını jurnalın 121-ci nəşrində yayımlanan məqaləsində ətraflı şəkildə ifadə edib. Qeyd edək ki, Avstraliyada nəşr olunan bu jurnalın təsisçisi və naşiri Janet Mansfilddir. Jurnal oxuculara keramika ilə bağlı üç müxtəlif yanaşmanı - elmi, texniki və yaradıcı – təqdim etməklə yanaşı keramika sənəti üçün olduqca vacib olan yeni anlayışların, problemlərin, tənqidi şərhlərin akademiklərdən, peşəkar yazıçılardan və sənət tənqidçilərindən oxuculara çatdırılması üçün geniş platforma yaradıb. Məqalə ilə burada tanış ola bilərsiniz.