News

Leyla Əliyevanın təşəbbüsü ilə icra olunan “Gənc arıçı” layihəsi Yevlaxda keçiriləcək

Gənc ailələrin məşğulluğu və ekoloji sahibkarlığın təşviqi məqsədilə həyata keçirilən “Gənc arıçı” layihəsi bu dəfə Yevlaxda icra olunacaq. Layihə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə 2021-ci ildən etibarən ölkəmizin müxtəlif bölgələrində uğurla reallaşdırılır. "ABAD" publik hüquqi şəxs bu il də “Gənc arıçı” layihəsində tərəfdaş qismində iştirak edəcək. Layihəyə cəlb olunacaq 20 gənc ailə əvvəlcə nəzəri və praktiki təlimlərdə iştirak edəcək. Təlimləri başa vurmuş iştirakçılar arı ailələri və pətəklər, arıçı geyimi, balsüzən aparat və digər zəruri avadanlıqlarla təmin olunacaqlar. Gənc arıçılara istehsalat prosesinin effektiv təşkili üçün zəruri şərait yaradılacaq, eyni zamanda məhsulların sertifikatlaşdırılması, brendləşdirilməsi, dizaynı və satış strategiyalarının hazırlanması sahəsində metodoloji və peşəkar dəstək göstəriləcək.Qeyd edək ki, 2021-ci ildən etibarən IDEA İctimai Birliyinin təşəbbüsü və Azərbaycan Respublikasının Gənclər Fondu, Dövlət Məşğulluq Agentliyi və ABAD publik hüquqi şəxsin tərəfdaşlığı ilə həyata keçirilən “Gənc arıçı” layihəsi çərçivəsində ölkənin müxtəlif regionlarında yaşayan 80-dən çox gənc ailəyə arıçılıq təsərrüfatının qurulmasına dəstək göstərilib.Layihənin məqsədi biomüxtəlifliyin əsas qoruyucularından biri olan arıların ölkə üzrə yayılma arealının genişləndirilməsi, arıçılığın ekosahibkarlıq forması kimi regionlarda təşviqi, ekoloji cəhətdən təmiz kənd təsərrüfatı fəaliyyətlərinin dəstəklənməsi və keyfiyyətli təbii bal istehsalının artırılmasıdır. Eyni zamanda layihə, gənc ailələrin sosial rifahının yüksəldilməsinə və onların dayanıqlı məşğulluğunun təmin olunmasına töhfə verməyi hədəfləyir.“Gənc arıçı” layihəsində iştirak etmək istəyən Yevlaxda yaşayan 18-35 yaş arası gənclər mayın 5-dək müraciətlərini IDEA İctimai Birliyinin “1113” qaynar xətti və ya elektron poçt ünvanı(info@ideacampaign.org) vasitəsilə göndərə və ya Dövlət Məşğulluq Agentliyinin Yevlax xidmət şöbəsinə yaxınlaşaraq qeydiyyatdan keçə bilərlər.

21.04.2026

ABŞ nümayəndə heyəti “ABAD” müəssisəsində

Amerika Birləşmiş Ştatlarının (ABŞ) Azərbaycan Respublikasındakı səfirliyinin müvəqqəti işlər vəkili Emi Karlon Quba rayonuna səfər çərçivəsində “ABAD Factory” İstehsalat Kompleksinin fəaliyyəti ilə tanış olub.Qonağa Azərbaycan Respublikasının Prezidenti İlham Əliyevin 23 sentyabr 2016-cı il tarixli Fərmanı ilə yaradılmış “ABAD” publik hüquqi şəxsin fəaliyyəti barədə məlumat verilib. Bu çərçivədə mikro, kiçik və orta sahibkarlığın inkişafına dəstək, ailə təsərrüfatlarının formalaşması, yerli istehsalın təşviqi, regionlarda məşğulluğun artırılması istiqamətində görülən işlərdən söz açılıb. Qeyd olunub ki, istehsalat kompleksinin yerləşdiyi bina 1956-cı ildə “Mədəniyyət evi” kimi inşa edilib, uzun müddət istismar olunduqdan sonra yararsız vəziyyətə düşüb. 2018-ci ildə bina “ABAD” publik hüquqi şəxs tərəfindən “Paşa Holding”in dəstəyi ilə əsaslı təmir-bərpa işləri aparılaraq müasir avadanlıqlarla təchiz edilmiş istehsalat kompleksinə çevrilib.Həmçinin vurğulanıb ki, “ABAD” publik hüquqi şəxs tərəfindən ailə təsərrüfatlarına istehsal, qablaşdırma, brendləşmə, marketinq, hüquqi yardım, mühasibatlıq və satış istiqamətləri üzrə kompleks dəstək xidmətləri göstərilir, milli məhsulların bazara çıxış imkanları genişləndirilir.İstehsal prosesi və iş prinsipi ilə tanış olan Emi Karlon burada hazırlanan qida məhsullarından dadıb. O, ailə təsərrüfatlarının dəstəklənməsinə və yerli istehsalın inkişafına yönəlmiş “ABAD” modelinin əhəmiyyətini vurğulayıb və quruma gələcək fəaliyyətində uğurlar arzulayıb.

29.01.2026

“ABAD” 1-ci “Ailə və Evlilik” Sərgisində

23 oktyabr 2025-ci il tarixində PAŞA Events-in təşkilatçılığı ilə Bakı Ekspo Mərkəzində Qafqazda və Azərbaycanda ilk dəfə keçirilən 1-ci “Ailə və Evlilik Sərgisi”nin açılış mərasimi baş tutub. Sərginin əsas məqsədi ailə dəyərlərinin təşviqi, toy mərasimlərinin təşkili üçün lazım olan məhsul və xidmət sektorlarının bir araya gətirilməsi, eləcə də yerli istehsalın, dizaynın və yaradıcı bizneslərin tanıdılmasıdır. Tədbir həm istehlakçılar, həm də sahibkarlar üçün birgə əməkdaşlıq, təcrübə və müxtəlif yanaşmaların mübadiləsi baxımından geniş imkanlar yaradır. “ABAD” publik hüquqi şəxs sərgidə ölkənin müxtəlif bölgələrindən olan “ABAD”çı ailələrin əl işlərini, milli dekor və suvenir nümunələrini, həmçinin qida məhsullarını təqdim edib. “ABAD” stendi ziyarətçilər tərəfindən böyük maraqla qarşılanıb, qonaqlar həm məhsullarla tanış olub, həm də onların hazırlanma prosesi barədə ətraflı məlumat əldə ediblər. Qeyd edək ki, sərgi oktyabrın 25-dək davam edəcəkdir.

24.10.2025

“ABAD” və Özbəkistanın “Sahibkarlığın İnkişafı Şirkəti” Səhmdar Cəmiyyəti arasında görüş keçirilib

9 oktyabr tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxs və Özbəkistanın “Sahibkarlığın İnkişafı Şirkəti” Səhmdar Cəmiyyəti arasında qarşı tərəfin təşəbbüsü ilə ikitərəfli görüş keçirilib. Görüşdə “ABAD” publik hüquqi şəxsin direktoru Rüfət Elçiyev, Özbəkistanın Sahibkarlığın İnkişafı Şirkətinin direktoru Abbasxon Maxamatov və hər iki qurumun rəsmi nümayəndə heyəti iştirak edib. Görüşün məqsədi qurumlar arasında qarşılıqlı tanışlıq, fəaliyyət sahələri üzrə məlumat mübadiləsi aparmaq və əməkdaşlıq potensialını ümumi şəkildə dəyərləndirmək olub. Görüş çərçivəsində tərəflər təqdimatlarla çıxış edərək fəaliyyət istiqamətləri, layihələr və sosial-iqtisadi təşəbbüslər barədə məlumat veriblər. Tərəflər mikro, kiçik və orta sahibkarlığın inkişafı, ailə bizneslərinin dəstəklənməsi, innovativ yanaşmalar və sosial təşəbbüslərin təşviqi sahəsində təcrübələrini bölüşüblər. Şirkətin direktoru Abbasxon Maxamatov “ABAD”ın fəaliyyətini yüksək dəyərləndirərək onun sosial-iqtisadi inkişaf sahəsində təqdirəlayiq nümunə olduğunu vurğulayıb.

10.10.2025

Brendi-Konyak Günündə “ABAD” öz stendi ilə iştirak edib

4 oktyabr tarixində Göygöl şəhərində Heydər Əliyev adına Mədəniyyət və İstirahət Parkında “Göygöl Brendi-Konyak Günü” tədbiri keçirilib. Tədbir Göygöl Rayon İcra Hakimiyyətinin təşkilatçılığı, Aqrar İnnovasiya Mərkəzi, Dövlət Turizm Agentliyi və digər tərəfdaş qurumların iştirakı ilə baş tutub. Tədbirin məqsədi Göygölün qədim üzümçülük və şərabçılıq ənənələrinin qorunması, brendi və konyak mədəniyyətinin tanıdılması, yerli məhsulların və turizm potensialının geniş auditoriyaya təqdim olunması olub. “ABAD” publik hüquqi şəxs tədbirdə öz sərgi stendi ilə təmsil olunub. Stenddə dekorativ-tətbiqi xalq sənətkarlıq nümunələri – zərgərlik, taxta üzərində oyma, dulusçuluq, rəngkarlıq, toxuculuq və digər “ABAD”çı əl işləri ilə yanaşı, qida məhsulları və şərab çeşidləri də təqdim olunub. Bu məhsullar yerli və xarici ziyarətçilər tərəfindən böyük maraqla qarşılanıb. Tədbirin sonunda “ABAD” sertifikatla təltif olunaraq yerli sənətkarlığın və ailə təsərrüfatlarının dəstəklənməsi istiqamətində əhəmiyyətli təşəbbüslərdən biri kimi qiymətləndirilib.

06.10.2025

“ABAD” 9-cu ilini qeyd edib

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan "ABAD" publik hüquqi şəxsin yaradılmasının doqquzuncu ildönümü ilə əlaqədar tədbir keçirilib.Tədbirdə Dövlət Agentliyinin sədri Ülvi Mehdiyev qurum əməkdaşlarını bu münasibətlə təbrik edib, onlara gələcək fəaliyyətlərində uğurlar arzulayıb."ABAD" publik hüquqi şəxsin direktoru Rüfət Elçiyev qurumun doqquz illik fəaliyyəti ilə bağlı hesabat xarakterli çıxış edib. O bildirib ki, ötən il “ABAD”ın fəaliyyəti daha da genişlənib, işğaldan azad edilmiş ərazilərdə təqdimatlar keçirilib, bu bölgələrdən toplanan bal məhsulları brendləşdirilərək satışa çıxarılıb, ABŞ bazarına məhsul ixrac olunub. “Wolt Market” platformasında onlayn satış aktivləşdirilib, həmçinin beş yeni satış məntəqəsində “ABAD” məhsulları təqdim olunub. Bundan əlavə, müxtəlif yeni məhsul çeşidləri istehsal edilərək bazara çıxarılıb.Pilot layihə olaraq Masallıda 7 ailə ilə fəaliyyətə başlayan “ABAD” 9 illik fəaliyyəti ərzində 677 ailəyə dəstək olaraq öz şəxsi bizneslərini inkişaf etdirməsi üçün xidmət göstərib. Həmin sahibkarlardan 508 nəfər dekorativ-tətbiqi xalq sənətimizi canlandıran və qoruyan istedadlı sənətkarlardır. 144 “ABAD”çı isə keyfiyyətli və təbii qida məhsulları istehsal edir. Bundan əlavə, 25 sahibkar müxtəlif sahələrdə öz bizneslərini uğurla inkişaf etdirir.Tədbir çərçivəsində xidməti fəaliyyətində fərqlənən əməkdaşlar təşəkkürnamələrlə təltif olunublar.“ABAD” publik hüquqi şəxs Azərbaycan Respublikasının Prezidenti İlham Əliyevin 23 sentyabr 2016-cı il tarixli Fərmanı ilə yaradılıb və ötən doqquz il ərzində ailə əməyinə əsaslanan mikro, kiçik və orta sahibkarlığın inkişafı, məşğulluğun artırılması və regionlarda sahibkarların biznes fəaliyyətinin dəstəklənməsi istiqamətində mühüm işlər görüb.