Xəbərlər

Nardaran “ABAD” Keramika və Tətbiqi Sənət Mərkəzinin məhsulları Laçında nümayiş olunub

26 avqust – Laçın şəhəri günüdür. Bu münasibətlə Heydər Əliyev Fondunun dəstəyi, Mədəniyyət Nazirliyinin və Prezidentin Laçın rayonunda xüsusi nümayəndəliyinin təşkilatçılığı ilə Laçın şəhərində Mənzərəli terrasda və Bayraq Meydanının qarşısında keçirilən bayram şənliyi təşkil olunub. Azərbaycan Respublikasının Prezidenti İlham Əliyev və birinci xanım Mehriban Əliyeva şənliklərdə iştirak ediblər. Tədbirdə “Laçın mənzərələri” adlı rəsm sərgisi, həmçinin Nardaran “ABAD” Keramika və Tətbiqi Sənət Mərkəzində hazırlanmış məhsullardan və müxtəlif digər sənətkarların şəbəkə, həsir sənəti, dulusçuluq, misgərlik, xalçaçılıq, tikmə, papaqçılıq və digər növlərinin də daxil olduğu incəsənət sərgisi açılıb. Prezident İlham Əliyev və birinci xanım Mehriban Əliyeva “Laçın Şəhəri Günü” bayram şənliklərində təşkil olunan sərgilərlə tanış olub, sənətkarlıq nümunələrinə baxıb, tamaşalar izləyib, tədbir iştirakçıları ilə söhbət ediblər. Qeyd edək ki, Nardaran “ABAD” Keramika və Tətbiqi Sənət Mərkəzi "TİKA" və "PAŞA Holding"in dəstəyi ilə 2018-2019-cu illərdə inşa edilərək istifadəyə verilib. Mərkəzin məqsədi ölkəmizin tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilinin dünyada tanıdılmasıdır.

28.08.2023

“ABAD” əməkdaşları genderə həssas xidmətlər təqdim edəcək

“ABAD” publik hüquqi şəxsin 9 əməkdaşı Böyük Britaniya Hökümətinin dəstəyi ilə, Birləşmiş Millətlər Təşkilatının İnkişaf Proqramının (BMTİP) Ailə, Qadın və Uşaq Problemləri üzrə Dövlət Komitəsi ilə birgə həyata keçirdiyi “İqtisadi və sosial iştirakın artmasına mane olan əngəlləri aradan qaldırmaq üçün Azərbaycanda münaqişədən təsirlənmiş həssas qruplara daxil olan qadınların səlahiyyətlərinin artırılması və onlar üçün bərabər imkanların yaradılması” layihəsi çərçivəsində Bakı şəhərində keçirilmiş “Genderə həssas xidmətlərin təqdim olunması” təlimində iştirak edib. Təlimlərdə gender bərabərliyinin təmin edilməsi, qadın hüquqlarının müdafiəsi, gender siyasəti, gender auditi, cinsi ayrı-seçkiliklə mübarizə üsulları mövzularına toxunulub. Təlimlərin əsas məqsədi dövlət qurumları tərəfindən kişi və qadınlara bütün sahələrdə bərabər imkanların yaradılması və bu tövsiyələrə əsaslanaraq qadınların kişilərlə bərabər təmsilçiliyinin təmin olunmasıdır. Təlimlərin nəticəsi olaraq “ABAD” publik hüquqi şəxsin 9 nümayəndəsi sertifikatlarla təltif edilmiş və bununla da onlar gələcəkdə öz xidmətlərini genderə həssas və inklüziv etmək üçün xidmətlər təqdim edə biləcək.

01.08.2023

Nardaran “ABAD” Keramika və Tətbiqi Sənət Mərkəzinə infotur təşkil edildi

27.07.2023-cü il tarixdə Nardaran “ABAD” Keramika və Tətbiqi Sənət Mərkəzinə infotur təşkil edildi.Tədbirdə Sabunçu Rayon İcra Hakimiyyəti başçısının müavini Rəna Fərəcova, “ABAD” publik hüquqi şəxsin direktor müavini Vüsal Arzumanlı, rayonun təhsil müəssisələrinin rəhbərləri, rayon sakinləri və rayon ictimaiyyətinin digər nümayəndələri iştirak edirdilər.Mərkəzin direktoru Aytən Həsənova bildirdi ki, 2018-2019-cu illərdə "PAŞA Holdinq"in dəstəyi ilə inşa edilən Nardaran "ABAD" Keramika və Tətbiqi Sənət Mərkəzi Türk Əməkdaşlıq və Koordinasiya Agentliyi ("TİKA") tərəfindən zəruri mal-material və avadanlıqlarla təchiz edilərək istifadəyə verilib.Mərkəzin məqsədi ölkəmizin tarixi keramika ənənələrinin gələcək nəsillərə ötürülməsi, ümumbəşəri dəyərlərin təbliği, Azərbaycan gilinin dünyada tanıdılması və gənclər arasında məşğulluğun artırılmasıdır. Qeyd olundu ki, mərkəzdə keramika sənəti üzrə ustad dərsləri və təlimlər keçirilir. Mərkəzin müxtəlif profilli avadanlıqla təchiz edilməsi digər keramika sənətkarları və həvəskarları üçün məhsulların bişirilmə və s. proseslərini ərsəyə gəlməsinə dəstək verir.Hazırda Mərkəzdə rayon sakinləri daimi iş yeri ilə təmin edilib. Onlar tərəfindən hər ay yüzlərlə müxtəlif çeşidli məhsul istehsal edilərək satışa çıxarılır. Daha sonra direktor qonaqları mərkəzin fəaliyyəti ilə daha yaxından tanış etdi və sənətkarlıq nümunələrinin ərsəyə gəlməsində vacib olan mərhələləri əyani şəkildə izah etdi.

27.07.2023

"ABAD" Şuşa Qlobal Media Forumunda təmsil olunub

Azərbaycanın mədəniyyət paytaxtı Şuşa şəhərində “Heydər Əliyev İli” və Azərbaycan Milli Mətbuatının 148-ci ildönümü münasibətilə təşkil edilən “4-cü Sənaye İnqilabı dövründə Yeni Media” Qlobal Forumu keçirilib. Üç gün davam edən Forumda “ABAD” publik hüquqi şəxs məhsullarından ibarət qida və sənətkarlıq stendləri ilə təmsil olunub. Əl işi olan “ABAD”çı məhsulları yerli və xarici qonaqlar tərəfindən böyük maraqla qarşılanıb. Qeyd edək ki, Foruma yerli və xarici media nümayəndələri, eyni zamanda, ekspertlər olmaqla 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumu qatılıb.

24.07.2023

“ABAD”ın ilk Qonaq Evi açıldı

Azərbaycanın zəngin turizm potensialına malik bölgələrindən biri olan Şəkinin turizm xəritəsində yeni ünvan: “Art Hotel by ABAD Guest”. Bu Qonaq Evi sıradan bir mehmanxana deyil, burada qonaqlama sənətkarlığın bir parçası olmaq deməkdir. Çünki hotel “ABAD” Keramika və Tətbiqi Sənət Mərkəzinin birinci mərtəbəsində təşkil edilib. Həmçinin bu Mərkəzin Şəki şəhər “Yuxarı Baş” Milli Tarix-Memarlıq Qoruğunda, Şərq memarlığının incisi hesab olunan Xan Sarayı kompleksinə daxil olan binada yerləşməsi butik hoteli tarixin də bir parçası olduğunu özünün hər bir daşında duyurur. Qonaq Evi Şərq üslubunda dizayn edilmiş 8 nömrədən ibarətdir, ümumi olaraq burada 20 nəfərədək qonağın yerləşdirmək imkanı var. Hər nömrə sanitar qovşağı və digər zəruri infrastrukturla təmin olunub. Qonaqlar üçün həmçinin sənətkarlıq emalatxanalarında duluşçuluq və keramika üzrə ustad dərslərindən yararlanmaq xidmətinə xüsusi endirimlər olacaq. Bundan başqa, burada qış mövsümü üçün restoran və yay mövsümü üçün açıq terras təşkil olunub. Qeyd edək ki, “Art Hotel by ABAD Guest” Qonaqlama Evi “ABAD” publik hüquqi şəxsin “Turizm” istiqaməti çərçivəsində fəaliyyətə başlayan ilk qonaq evidir. Hotel çox yaxın zamanda qonaqların aktiv qəbuluna start verəcək.

20.06.2023

“ABAD” Heydər Əliyevin 100 illik yubileyinə həsr olunmuş sərgi keçirib

16 iyun 2023-cü il tarixində “ABAD” publik hüquqi şəxsin təşkilatçılığı ilə Şəki Keramika və Tətbiqi Sənət Mərkəzində Ümummilli lider Heydər Əliyevin 100 illik yubileyinə həsr olunmuş “Ulu Öndərim” sərgisi baş tutub. Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Dövlət Turizm Agentliyinin sədri Fuad Nağıyev, Şəki Şəhər İcra Hakimiyyətinin başçısı Elxan Usubov, ictimaiyyət nümayəndələri iştirak ediblər.Qonaqlar Ulu öndər Heydər Əliyevin zəngin dövlətçilik və ictimai-siyasi fəaliyyətindən, ölkəmizin tərəqqisi, çiçəklənməsi istiqamətində həyata keçirdiyi tədbirlərdən söz açıblar.   Sonra ABADçıların əl işlərindən, rəsm əsərlərindən və şəkillərdən ibarət sərgi ilə tanışlıq olub.  Eksponatlar dekorativ-tətbiqi xalq sənətkarlığının müxtəlif texnikalarında işlənilib. Məhsulların hər biri sərgidən sonra “ABAD” etno-butiklərində satışa çıxarılacaq.Tədbir çərçivəsində Mərkəzin birinci mərtəbəsində yerləşən və “ABAD”ın ilk qonaq evi olan “Art Hotel by ABAD Guest”in açılışı baş tutub. Qonaqlar şərq üslübünda dizayn edilmiş butik hotelin 8 nömrəsi ilə tanış olublar. Burada 20 nəfərədək qonağı yerləşdirmək imkanı var və hər nömrə zəruri infrastrukturla təmin olunub.Qonaqlar üçün qədim sənətkarlıq emalatxanalarından yararlanmaq üçün xüsusi endirimlər nəzərdə tutulur. Burada qış mövsümü üçün restoran, yay üçün açıq terras təşkil olunacaq.Ümummilli lider Heydər Əliyevin 100 illik yubileyinə həsr olunmuş tədbir konsert proqramı ilə yekunlaşıb.