News

"ABAD"ın tərəfdaşı olduğu “Gənc arıçı” layihəsi Yevlax rayonunda uğurla yekunlaşıb

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən “Gənc arıçı” layihəsi Yevlax rayonunda uğurla yekunlaşıb.Layihə çərçivəsində Yevlax rayonundan müraciət edən 20 gənc ailə seçilərək cari il ərzində xüsusi təlim proqramına cəlb olunub. Təlimlər zamanı iştirakçılara təcrübəli arıçılar tərəfindən həm nəzəri biliklər, həm də praktik bacarıqlar aşılanıb. Təlim proqramını başa vuran iştirakçılara arıçılıq təsərrüfatı qurmaq üçün arı ailələri, pətəklər, arıçı geyimləri, balsüzən aparat və digər zəruri avadanlıqlar təqdim olunub. Bununla da gənc ailələrin müstəqil təsərrüfat fəaliyyətinə başlaması üçün lazımi şərait yaradılıb.Növbəti dövrdə isə layihə iştirakçılarına təsərrüfatlarının inkişafı, məhsuldarlığın artırılması və istehsal etdikləri təbii bal məhsullarının təqdimatı və satışı istiqamətində dəstək göstərilməsi davam etdiriləcək. “Gənc arıçı” layihəsi IDEA İctimai Birliyi, Gənclər Fondu, Dövlət Məşğulluq Agentliyi və ABAD publik hüquqi şəxsin tərəfdaşlığı ilə 2021-ci ildən həyata keçirilir. Bu günədək layihə çərçivəsində ölkənin müxtəlif regionlarında yaşayan 80-dən çox gənc ailəyə arıçılıq təsərrüfatının qurulmasına dəstək göstərilib. Layihə iştirakçılarının istehsal etdikləri təbii bal məhsulları müxtəlif bal festivalları və yarmarkalarında təqdim olunub.Layihənin xüsusi məqamlarından biri də Leyla Əliyevanın ötən dövr ərzində regionlara səfərləri zamanı "Gənc arıçı" layihəsinin iştirakçılarını evlərində ziyarət etməsi, onların təsərrüfatları ilə tanış olması, fəaliyyətləri ilə maraqlanması və dəstək göstərməsidir.Qeyd edək ki, “Gənc arıçı” layihəsinin əsas məqsədi biomüxtəlifliyin qorunmasında mühüm rol oynayan arıların ölkə üzrə yayılma arealının genişləndirilməsi, arıçılığın ekosahibkarlıq forması kimi regionlarda təşviqi, ekoloji cəhətdən təmiz kənd təsərrüfatı fəaliyyətlərinin dəstəklənməsi və keyfiyyətli təbii bal istehsalının artırılmasıdır.Eyni zamanda, layihə gənc ailələrin sosial rifahının yaxşılaşdırılmasına, regionlarda dayanıqlı məşğulluğun təmin olunmasına və ailə təsərrüfatlarının inkişafına töhfə verir.

05.06.2026

“ABAD” tərəfindən “ASAN Məktub – Yaz Düşərgəsi 2”də ustad dərsləri keçirilib

“ASAN Məktub – Yaz Düşərgəsi 2” layihəsi çərçivəsində “ABAD” publik hüquqi şəxsin sənətkarları tərəfindən düşərgədə iştirak edən uşaqlar üçün dulusçuluq və keramika sənəti üzrə ustad dərsləri təşkil olunub. İnteraktiv formatda keçirilən ustad dərsində iştirakçılar gil ilə işləmə texnikaları ilə tanış olub, müxtəlif fiqurlar hazırlayaraq yaradıcılıq bacarıqlarını nümayiş etdirmək imkanı əldə ediblər. Tədbir zamanı uşaqlara dulusçuluq sənətinin incəlikləri və milli sənətkarlıq ənənələri haqqında məlumat verilib. Qeyd edək ki, Azərbaycan Respublikasının Gənclər və İdman Nazirliyi, IDEA İctimai Birliyi və “ASAN Könüllüləri” Təşkilatının “ASAN Məktub” sosial proqramının birgə təşkilatçılığı ilə 1–4 iyun tarixlərində Respublika Uşaq İstirahət və Sağlamlıq Mərkəzində “ASAN Məktub – Yaz Düşərgəsi 2” layihəsi həyata keçirilir. Düşərgədə Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində fəaliyyət göstərən uşaq evi sosial xidmət müəssisələrindən 8–14 yaş kateqoriyasında olan 50 nəfər uşaq iştirak edir. Layihənin məqsədi uşaqların sosial, kommunikasiya və yaradıcılıq bacarıqlarının inkişaf etdirilməsi, komanda işi və özünüifadə imkanlarının genişləndirilməsi, eləcə də onların asudə vaxtlarının faydalı və interaktiv şəkildə təşkilidir.

02.06.2026

Leyla Əliyeva və Arzu Əliyeva Lənkəranda "ABAD"çı sənətkarın yaradıcılığı ilə tanış olublar

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva və Bakı Media Mərkəzinin rəhbəri Arzu Əliyeva Lənkərana səfəri çərçivəsində dekorativ-tətbiqi sənət ustası "ABAD"çı Samir Həbibovun yaradıcılıq fəaliyyəti ilə tanış olublar.Leyla Əliyeva və Arzu Əliyeva sənətkarın evində yerləşən emalatxanasında olub, onun hazırladığı dekorativ əl işlərinə baxış keçiriblər. Görüş zamanı Samir Həbibov bədii oyma sənətinin incəlikləri, istifadə etdiyi materiallar və hazırladığı dekorativ nümunələr barədə məlumat verib. Leyla Əliyeva və Arzu Əliyeva oyma prosesi ilə tanış olub, sənətkarla birlikdə əl işləri hazırlayıblar. Qeyd edək ki, Samir Həbibov bu qədim sənətin incəliklərini hələ uşaq yaşlarından atasından öyrənib. O, əsasən müxtəlif növ ağac materiallarından milli ornamentlərlə bəzədilmiş suvenirlər, dekorativ əşyalar və məişət üçün nəzərdə tutulan əl işləri hazırlayır. Sənətkarın hazırladığı suvenirlər Ailə Biznesinə Asan Dəstək Mərkəzinin (ABAD) satış şəbəkəsi vasitəsilə istehlakçılara təqdim olunur.

27.05.2026

“ABAD” WUF13 çərçivəsində təşkil olunan yarmarkada iştirak edib

20–22 may tarixlərində Dənizkənarı Milli Park ərazisində, Saat Qülləsinin yaxınlığında təşkil olunan “Şəhərsalma Yarmarkası”nda “ABAD” sərgi-satış stendi ilə iştirak edib.Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində baş tutan yarmarka şəhər sakinləri və paytaxtımıza gələn xarici qonaqlar tərəfindən böyük maraqla qarşılanıb. Tədbir çərçivəsində müxtəlif sərgilər, təqdimatlar və rəngarəng proqramlar nümayiş olunub.“ABAD”ın stendində ölkənin müxtəlif bölgələrində fəaliyyət göstərən sənətkarlar və ailə təsərrüfatları tərəfindən hazırlanan əl işləri, milli suvenirlər, dekorativ-tətbiqi xalq sənətkarlığı nümunələri və qida məhsulları təqdim edilib. Ziyarətçilər Azərbaycan mədəniyyətini və milli dəyərlərini əks etdirən məhsullarla yaxından tanış olmaq imkanı əldə ediblər.Yarmarka müddətində “ABAD” stendi yerli və xarici ziyarətçilərin xüsusi marağına səbəb olub, təqdim olunan məhsullar qonaqlar tərəfindən böyük rəğbətlə qarşılanıb.

25.05.2026

“ABAD” və Mərakeşin “Sənətkarlar Evi” arasında əməkdaşlıq imkanları müzakirə olunub

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov Mərakeş Krallığının Turizm, Sənətkarlıq və Sosial İqtisadiyyat Nazirliyinin tabeliyində fəaliyyət göstərən “Sənətkarlar Evi” (“Maison de l’Artisan”) qurumunun baş direktoru Tarik Sadiqlə görüşüb.Görüşdə qonağa Dövlət Agentliyinin nəzdində fəaliyyət göstərən “ABAD” publik hüquqi şəxsin fəaliyyəti barədə təqdimat edilib.Tərəflər arasında keçirilən görüş çərçivəsində “ABAD” ilə Mərakeşin “Sənətkarlar Evi” qurumu arasında əl sənətkarlığı sahəsində əməkdaşlıq perspektivləri müzakirə olunub. Qonaq, həmçinin İçərişəhərdə yerləşən "ABAD" etno-butiki ilə yaxından tanış olub.

04.05.2026

Leyla Əliyeva və Arzu Əliyeva Şəkidə “ABAD” Keramika və Tətbiqi Sənət Mərkəzi ilə tanış olublar

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva və Arzu Əliyeva Şəkidə “Yuxarı Baş” Milli Tarix-Memarlıq Qoruğunun ərazisində fəaliyyət göstərən “ABAD” Keramika və Tətbiqi Sənət Mərkəzi ilə tanış olublar.Bildirilib ki, Mərkəzin yaradılmasında əsas məqsəd Azərbaycanın, xüsusilə Şəki bölgəsinin qədim keramika irsinin qorunması, bu sənət ənənələrinin gələcək nəsillərə ötürülməsi və ölkəmizin mədəni irsinin tərkib hissəsi kimi beynəlxalq səviyyədə tanıdılmasına töhfə verməkdir. Qeyd olunub ki, Mərkəzdə yerli sənətkarlar üçün əlverişli istehsal şəraiti yaradılıb, onların məhsullarının bazara çıxışı və yaradıcılıq fəaliyyətinin inkişafı dəstəklənir. Daha sonra Leyla Əliyeva və Arzu Əliyeva “ABAD”çı rəssam keramistlərin fəaliyyəti ilə yaxından tanış olub, keramika məhsullarının hazırlanması prosesində sənətkarlarla birlikdə iştirak ediblər. Sənətkarlar tərəfindən müxtəlif keramika nümunələrinin hazırlanmasında Leyla Əliyevanın rəsm əsərlərindən ilham alındığı diqqətə çatdırılıb. Leyla Əliyeva əsərlərinə göstərilən diqqətə görə keramistlərə təşəkkür edib, milli sənət ənənələrinin qorunması və inkişafı istiqamətində fəaliyyətlərini yüksək qiymətləndirib, onlara yeni yaradıcılıq uğurları arzulayıb. Sonda Mərkəzin kollektivi və sənətkarlarla xatirə şəkilləri çəkdirilib.