News

“ABAD”ın ilk Qonaq Evi açıldı

Azərbaycanın zəngin turizm potensialına malik bölgələrindən biri olan Şəkinin turizm xəritəsində yeni ünvan: “Art Hotel by ABAD Guest”. Bu Qonaq Evi sıradan bir mehmanxana deyil, burada qonaqlama sənətkarlığın bir parçası olmaq deməkdir. Çünki hotel “ABAD” Keramika və Tətbiqi Sənət Mərkəzinin birinci mərtəbəsində təşkil edilib. Həmçinin bu Mərkəzin Şəki şəhər “Yuxarı Baş” Milli Tarix-Memarlıq Qoruğunda, Şərq memarlığının incisi hesab olunan Xan Sarayı kompleksinə daxil olan binada yerləşməsi butik hoteli tarixin də bir parçası olduğunu özünün hər bir daşında duyurur. Qonaq Evi Şərq üslubunda dizayn edilmiş 8 nömrədən ibarətdir, ümumi olaraq burada 20 nəfərədək qonağın yerləşdirmək imkanı var. Hər nömrə sanitar qovşağı və digər zəruri infrastrukturla təmin olunub. Qonaqlar üçün həmçinin sənətkarlıq emalatxanalarında duluşçuluq və keramika üzrə ustad dərslərindən yararlanmaq xidmətinə xüsusi endirimlər olacaq. Bundan başqa, burada qış mövsümü üçün restoran və yay mövsümü üçün açıq terras təşkil olunub. Qeyd edək ki, “Art Hotel by ABAD Guest” Qonaqlama Evi “ABAD” publik hüquqi şəxsin “Turizm” istiqaməti çərçivəsində fəaliyyətə başlayan ilk qonaq evidir. Hotel çox yaxın zamanda qonaqların aktiv qəbuluna start verəcək.

20.06.2023

“ABAD” Heydər Əliyevin 100 illik yubileyinə həsr olunmuş sərgi keçirib

16 iyun 2023-cü il tarixində “ABAD” publik hüquqi şəxsin təşkilatçılığı ilə Şəki Keramika və Tətbiqi Sənət Mərkəzində Ümummilli lider Heydər Əliyevin 100 illik yubileyinə həsr olunmuş “Ulu Öndərim” sərgisi baş tutub. Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Dövlət Turizm Agentliyinin sədri Fuad Nağıyev, Şəki Şəhər İcra Hakimiyyətinin başçısı Elxan Usubov, ictimaiyyət nümayəndələri iştirak ediblər.Qonaqlar Ulu öndər Heydər Əliyevin zəngin dövlətçilik və ictimai-siyasi fəaliyyətindən, ölkəmizin tərəqqisi, çiçəklənməsi istiqamətində həyata keçirdiyi tədbirlərdən söz açıblar.   Sonra ABADçıların əl işlərindən, rəsm əsərlərindən və şəkillərdən ibarət sərgi ilə tanışlıq olub.  Eksponatlar dekorativ-tətbiqi xalq sənətkarlığının müxtəlif texnikalarında işlənilib. Məhsulların hər biri sərgidən sonra “ABAD” etno-butiklərində satışa çıxarılacaq.Tədbir çərçivəsində Mərkəzin birinci mərtəbəsində yerləşən və “ABAD”ın ilk qonaq evi olan “Art Hotel by ABAD Guest”in açılışı baş tutub. Qonaqlar şərq üslübünda dizayn edilmiş butik hotelin 8 nömrəsi ilə tanış olublar. Burada 20 nəfərədək qonağı yerləşdirmək imkanı var və hər nömrə zəruri infrastrukturla təmin olunub.Qonaqlar üçün qədim sənətkarlıq emalatxanalarından yararlanmaq üçün xüsusi endirimlər nəzərdə tutulur. Burada qış mövsümü üçün restoran, yay üçün açıq terras təşkil olunacaq.Ümummilli lider Heydər Əliyevin 100 illik yubileyinə həsr olunmuş tədbir konsert proqramı ilə yekunlaşıb.

19.06.2023

Azərbaycan və Türkiyə birinci xanımları “ABAD” etno-butikində

İyunun 13-də Azərbaycan Respublikasının birinci xanımı Mehriban Əliyeva və Türkiyə Respublikasının birinci xanımı Əminə Ərdoğan Bakıda dünya mədəni irsi abidələrindən sayılan İçərişəhərdə olublar. Qoruğda olan birinci xanımlar həmçinin burada fəaliyyət göstərən “ABAD” publik hüquqi şəxsin etno-butikinə təşrif buyurublar.Əminə Ərdoğan və Mehriban Əliyevanın diqqətlərinə çatdırılıb ki, “ABAD” etno-butiki tarixi Hacı Bani hamamında yerləşir. Hamam XV əsrin abidəsidir. 2017-ci ildə burada TİKA, PAŞA Holding və SOCAR-ın dəstəyi ilə təmir-bərpa işləri aparıldıqdan sonra elə həmin ilin 18 mart tarixində “ABAD”ın ilk etno-butiki fəaliyyətə başlayıb.Etno-butikdə “ABAD”çılar tərəfindən dekorativ-tətbiqi xalq sənətkarlığının müxtəlif texnikalarında hazırlanmış suvenir, mebel və qida məhsulları satışa çıxarılır. Qeyd edilib ki, hazırda 560-dan çox sənətkarın on minlərlə məhsulu burada təqdim olunur.Sonda hər iki xanıma sənətkar-“ABAD”çıların adından əl işi milli suvenirlər hədiyyə edilib.Görüşdən sonra, Türkiyə Respublikasının birinci xanımı Əminə Ərdoğan “ABAD” haqqında bu sözləri qeyd edib:“TİKA”nın desteğiyle faaliyete geçirilen Aile Hazinesi’ne Akan Destek Merkezi’ni (ABAD) inceleyerek, yetkililerden bilgi aldım.Proje ile Azerbaycan’da geleneksel el sanatları yaşatılıyor, dünyaya tanıtılıyor ve aile ekonomisine katkı sağlanıyor.Emek emek işlenmiş eserlerin her birine hayranlık duymamak elde değil. Hem ülkenin hem de Türk kültürünün markalaşması adına bu projeyi hayata geçiren herkesi gönülden tebrik ediyorum.”

13.06.2023

“ABAD”çılar Qarabağda ustad dərsləri veriblər

Qarabağ iqtisadi rayonuna daxil olan işğaldan azad edilmiş ərazilərdə Azərbaycan Respublikası Prezidentinin xüsusi nümayəndəliyinin və Qarabağ İqtisadi Rayonunda Bərpa, Tikinti və İdarəetmə Xidmətinin təşkilatçılığı ilə Tərtər rayonunun işğaldan azad edilmiş Talış kəndində 1 İyun - Uşaqların Beynəlxalq Müdafiəsi Günü qeyd edilib.Burada “Talışın balaca sakinləri üçün ustad dərsi və bayram şənliyi” tədbiri təşkil olunub. Talışda məskunlaşan bağça və məktəb şagirdlərinin iştirak etdikləri tədbirdə kəndin balaca sakinlərinə Nardaran “ABAD” Keramika və Tətbiqi Sənət Mərkəzi və digər “ABAD”çılar tərəfindən ustad dərsi keçirilib.Bu məqsədlə tədbirdə dulusçu, rəngkar, zərgər olmaqla 4 dekorativ-tətbiqi xalq sənətkarlığı nümayəndəsi iştirak edib. Onlar balacalarla birlikdə sənət əsərləri üzərində işləyiblər.Qeyd edək ki, 1 iyun - Uşaqların Beynəlxalq Müdafiəsi Günü uşaqların iştirakı ilə Qarabağda 30 il sonra ilk dəfə olaraq baş tutub.

01.06.2023

İkinci “SmFreshOil by ABAD” stendinin açılışı baş tutdu

27 aprel 2023-cü il tarixində "BRAVO" marketlər şəbəkəsinin “20 Yanvar” filialında “ABAD” publik hüquqi şəxsin dəstəyi ilə ikinci “SmFreshOil by ABAD” stendinin açılışı baş tutub.Tədbirdə “SmFreshOil” brendinin sahibi “ABAD”çı Maya Səbzəliyeva, “ABAD” publik hüquqi şəxsin rəsmi nümayəndləri, bir sıra tanınmış şəxslər və blogerlər iştirak edib.Qeyd edək ki, bu stenddə də müştərilərin gözü önündə soyuq sıxım yağlar və çərəzlərdən müxtəlif əzmələr hazırlanaraq yerindəcə müştərilərə təqdim olunacaq.Bundan başqa, “SmFreshOil by ABAD“ stendində həmçinin müxtəlif çeşid sağlamlığa faydalı məhsulların satışı həyata keçiriləcəkdir:- Soyuq sıxım yağlar;- Əzmələr;- Qlütensiz unlar;- Məcunlar və orqanik şokolad pastaları;- Bəhməz və s.Ünvan: Tbilisi prospekti, 3007-ci məhəllə (20 Yanvar m/s yanı), "BRAVO" Hipermarket.Xatırladaq ki, ilk “SmFreshOil by ABAD” stendi "BRAVO" Koroğlu hipermarketində ötən ilin aprelindən uğurla fəaliyyət göstərir.

27.04.2023

“ABAD” Yasamal rayonu sahibkarları ilə görüş keçirdi

13 aprel 2023-cü il tarixində Yasamal rayon İcra Hakimiyyətinin inzibati binasında “ABAD” publik hüquqi şəxsin sahibkarlarla görüşü baş tutdu. Görüşdə “ABAD” publik hüquqi şəxsin direktoru Rüfət Elçiyev və RİH başçısının I müavini Hüseyn Əfəndiyev iştirak ediblər.Görüşü giriş sözü ilə açan RİH başçısının I müavini sahibkarlığın inkişafı istiqamətində xalqımızın Ümummilli Lideri Heydər Əliyevin prinsip və ənənələrinin bu gün dövlət başçısı cənab İlham Əliyev tərəfindən qətiyyətlə davam etdirildiyini vurğulayaraq, ötən illər ərzində həyata keçirilən layihələr haqqında görüş iştirakçılarına məlumat verdi. Hüseyn Əfəndiyev həmçinin “ABAD” mərkəzləri şəbəkəsinin genişləndirilməsinin davam etdirilməsi və iri şirkətlər tərəfindən ailə təsərrüfatlarının dəstəklənməsinin təşviqindən də söz açdı.Görüşdə iştirak edən “ABAD” publik hüquqi şəxsin direktoru Rüfət Elçiyev bildirib ki, “ABAD”ın fəaliyyəti Azərbaycan Respublikasının sosial-iqtisadi inkişafında vətəndaşların fəal iştirakına, mikro, kiçik və orta sahibkarlığın inkişafına, əhalinin məşğulluq səviyyəsinin artırılmasına və rəqabətqabiliyyətli ailə təsərrüfatlarının formalaşdırılmasına dəstək verməyə istiqamətlənib. Bundan başqa o, görülmüş işlər və gələcəkdə nəzərdə tutulmuş layihələr haqqında sahibkarlara məlumat verib.Tədbir daha sonra qarşılıqlı fikir mübadiləsi və sual-cavab şəklində davam etdirilib, sahibkarları maraqlandıran suallar cavablandırılıb.