News

“ABAD”ın yeni etno-butiki Şərq Bazarında

6 iyun 2022-ci il tarixində “Paşa Holding”in dəstəyi ilə yenicə restavrasiya edilmiş Şərq Bazarında “ABAD”ın sayca 12-ci etno-butikinin açılışı baş tutdu. Açılış zamanı ölkə prezidenti və birinci xanım "ABAD"ın fəaliyyətə başlayacaq olan yeni etno-butikini ziyarət edərək "ABAD" məhsulları ilə yaxından tanış oldular.Şərq bazarı 1982-ci ildən paytaxtın simvollarından biri sayılaraq, ölkənin tarixi abidələri siyahısına daxil edilib. Kompleksin təşkili qapalı şərq bazarlarının ənənəvi prinsiplərinə, daxili həyət ideyasına, səciyyəvi şərq günbəzlərinə və ornamentlərinə əsaslanırdı. 2008-ci ildən isə kompleks fəaliyyət üçün yararsız hala gəldi. Lakin, 2018-ci ildə “PMD Projects” qrupu binanın yenidən qurulması işlərinə start verildi. Beləliklə, "Şərq Bazarı" yenidən öz qapılarını memarlığı, ənənəvi dekorativ-tətbiqi sənəti, bədii sənətkarlığı və şərq mətbəxini sevənlərin üzünə açdı. Bu səbəbdən dekorativ-tətbiqi xalq sənətkarlığının təbliğ və inkişafına töhfə verən qurum kimi “ABAD”ın etno-butikinin burada fəaliyyət göstərməsi məqsədəmüvafiq hesab edilib. Bununla da, mövcud və gələcəkdə layihəyə daxil olacaq yüzlərlə sənətkar-“ABAD”çının burada, turizm baxımından cəlbedici olan bazarda, məhsulları satışa çıxarılacaq.

06.06.2022

Nardaran “ABAD” Keramika və Tətbiqi Sənət mərkəzində Uşaqların Beynəlxalq Müdafiəsi Günü keçirildi

1 İyun – Uşaqların Beynəlxalq Müdafiəsi Günü münasibətilə, Sabunçu Rayon İcra Hakimiyyəti, Bakı şəhər Gənclər və İdman Baş İdarəsinin birgə təşkilatçılığı “Uşaqlar Gülsün Deyə” adlı uşaq festivalı keçirildi. Festival Sabunçu rayonu, Nardaran qəsəbəsi, Nardaran Mədəniyyət Mərkəzi və "ABAD" Keramika və Tətbiqi Sənət mərkəzlərinin qarşısında keçirilb. Festival çərçivəsində Nardaran “ABAD” Keramika və Tətbiqi Sənət mərkəzinin sənətkarları uşaqlar üçün dulusçuluq, keramika və rəngkarlıq üzrə master klasslar keçirib. Bundan başqa mərkəzdə “Açıq gün” keçirildi, burada hazırlanan əl işlərinin səyyar satışı baş tutdu. Qeyd edək ki, Nardaran “ABAD” Keramika və Tətbiqi Sənət Mərkəzi "TİKA" və "PAŞA Holding"in dəstəyi ilə 2018-2019-cu illərdə inşa edilərək istifadəyə verilib. Mərkəzin məqsədi ölkəmizin tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilinin dünyada tanıdılmasıdır.

01.06.2022

“ABAD”ın yeni etno-butiki açıldı

28 may 2022-ci il tarixində 7 saylı Bakı “ASAN xidmət” mərkəzinin açılışı çərçivəsində mərkəzin 1-ci mərtəbəsində “ABAD” publik hüquqi şəxsin növbəti, sayca 11-ci etno-butikinin açılışı baş tutdu.Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan açılışda iştirak ediblər.Bildirildi ki, digər etno-butiklərdə olduğu kimi, burada da sənətkar “ABAD”çıların əl əməyinin nəticəsi olan dekorativ-tətbiqi xalq sənətkarlığı nümunələrinin daimi sərgi-satışı, həmçinin “ABAD”ın dəstək göstərdiyi ailə təsərrüfatlarının qida brendlərinin satışı həyata keçiriləcəkdir.Daha sonra Azərbaycan və Türkiyə prezidentlərinə “ABAD”çıların əl işi olan xatirə hədiyyələri təqdim olundu.Qeyd edək ki, bu mərkəzlə birgə paytaxtda 7, regionlarda isə 6 etno-butik fəaliyyət göstərir:- “ABAD” etno-butiki İçərişəhər filialı;- “ABAD” etno-butiki “Fairmont” filialı;- “ABAD” etno-butiki “Duty Free” filialı;- “ABAD” etno-butiki 3 saylı Bakı “ASAN xidmət” mərkəzi filialı;- “ABAD” etno-butiki 7 saylı Bakı “ASAN xidmət” mərkəzi filialı;- “ABAD” etno-butiki Bakı Dəmiryolu Vağzalı filialı; - “ABAD” etno-butiki Milli Gimnastika Arenası filialı (yalnız beynəlxalq yarışlar zamanı);- “ABAD” etno-butiki Dəmirçi kəndi filialı;- “ABAD” etno-butiki “Tufandağ” Qış-Yay Turizm İstirahət Kompleksi filialı;- “ABAD” etno-butiki Şəki Keramika və Tətbiqi Sənət mərkəzi filialı ;- “ABAD” etno-butiki Masallı “ASAN Həyat” kompleksi filialı.Bundan başqa, yeni fəaliyyətə başlayacaq mərkəzin həyətində "Good Food by ABAD" təkərli qoşquda (food truck) müxtəlif təamlar təqdim olunacaq.

28.05.2022

“ABAD” “Səngərdən sənətə” sərgisini təqdim etdi

26 -29 may 2022-ci il tarixlərində Azərbaycanda ilk dəfə olaraq “Teknofest” Festivalı keçirilir. “ABAD” bu festival üçün xüsusi hazırlanmış “Səngərdən sənətə” sərgisi ilə çıxış edir. Sərgi ANAMA-nın (Azərbaycan Respublikasının Minatəmizləmə Agentliyi) dəstəyi ilə yaradılıb. Layihə çərçivəsində ANAMA işğaldan azad edilmiş torpaqlarda aşkar etdiyi minaları zərərləşdirərək “ABAD”a təhvil verib. Öz növbəsində “ABAD”çılar bu qalıqları sənət əsərlərinə çevirərək sərgi üçün təqdim edib. Eksponatların hər biri stimpank üslubunda hazırlanıb və ikinci Qarabağ müharibəsi mövzusuna aiddir. Eyni zamanda ABAD-çılar tərəfindən hazırlanan “Teknofest Azərbaycan” Aerokosmik və Texnologiya Festivalına aid, tədbirin logo və digər atributilarını təsvir edən suvenirlərin satışı təşkil olunur. Qeyd edək ki, “Teknofest” Festivalı Türkiyə Respublikası Sənaye və Texnologiya Nazirliyinin və “Baykar Makina” şirkətinin texniki direktoru Selçuk Bayraktarın rəhbərlik etdiyi Türkiye Teknoloji Takımı Vakfının birgə təşkilatçılığı və qardaş ölkənin 60-dan çox dövlət qurumu, ali məktəbi və özəl şirkətinin tərəfdaşlığı ilə 2018-ci ildən etibarən hər il keçirilir.

25.05.2022

"ABAD" "Balık ekmek" festivalına tərəfdaşlıq edib

18 may 2022-ci il tarixində Beynəlxalq Kənd Təsərrüfatı Sərgisi çərçivəsində Bakı EXPO Mərkəzinin qarşısında Türkiyə Respublikasının Kənd Təsərrüfatı və Meşəçilik Nazirliyi tərəfindən “Balık ekmek” balıq məhsulları festivalı təşkil olunub. “ABAD” publik hüquqi şəxs bu festivalın tərəfdaşlarından biri kimi çıxış edib. Festival ilə əlaqədar Türkiyədə akvakultura şəraitində balıq təsərrüfatlarında yetişdirilən 2 ton həcmində balıq məhsulları (dəniz çapaqı, dəniz xanısı, forel, qızılbalıq) Azərbaycana gətirilərək festival zamanı ziyarətçilərə ödənişsiz əsaslarla bişirilərək paylanılıb. Balıq məhsullarının hazırlanması “ABAD”ın təqdim etdiyi təkərli qoşqularda (food truck) təmin edilib. Qeyd edək ki, "Balık ekmek" festivalına gələn qonaqlara təamlar beş “food truck” vasitəsi ilə təqdim olunub.

18.05.2022

“ABAD” Azərbaycanda təşkil olunmuş ilk Feminarda

14 may 2022-ci il tarixində “ABAD” publik hüquqi şəxs Azərbaycanda ilk Feminar "Aurana Güvən" layihəsinin tərəfdaşlarından biri kimi çıxış edib. Qadınları ilhamlandırmaq məqsədi ilə onlara xitab edən dörd fərqli panel bir layihədə cəmləndi. İş qadını olmaq, sağlamlıq, analıq və gözəllik mövzularında yerli və türkiyəli spikerlər qadınlara "Yeni mən" yaratmağın sirlərini açıb, öz tövsiyələrini verdilər. Gün boyu davam edən tədbirdə “ABAD”çı və digər sahibkar qadınlara dəstək üçün xüsusi guşələr də yaradılmışdı. Burada “ABAD”ın milli suvenirlərindən ibarət xüsusi stend, “ABAD”çı Tutu Hüseynovadan vitraj master-klassları, “ABAD”ın dəstək verdiyi “Narlı” və “SM Fresh Oil” brendlərinin təsisçiləri Xalidə Həsənova və Maya Səbzəliyeva tərəfindən məhsullarının daddırmaları böyük rəğbət qazandı. Qeyd edək ki, hazırda “ABAD” publik hüquqi şəxsin dəstək proqramından faydalanan 515 “ABAD”çıdan 284-ü qadın-sahibkardır.