News

“ABAD” “Gənc arıçı” layihəsinin növbəti mərhələsində iştirak edir

“Yaşıl dünya naminə həmrəylik ili” və BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə 2021-ci ildən etibarən həyata keçirilən “Gənc arıçı” layihəsinin icrasına bu il Qəbələ rayonunda başlanılacaq. Layihə gənclər və gənc ailələr üçün arıçılıq təsərrüfatının yaradılması və düzgün inkişaf etdirilməsinə istiqamətlənib. Layihə çərçivəsində nəzəri və praktiki təlimlərə cəlb olunması nəzərdə tutulan 20 gənc ailə bir aylıq təlim müddətini tamamladıqdan sonra arıçılıq təsərrüfatı üçün lazım olan arı ailəsi və pətəkləri, arıçı geyimi, balsüzən aparat və digər lazımı ləvazimatlarla tam təchiz olunacaq və gənc arıçılara istehsalat prosesini effektiv icra etmələri üçün lazımi şərait yaradılacaq. IDEA İctimai Birliyi, ABAD” publik hüquqi şəxs, Azərbaycan Respublikasının Gənclər Fondu və Dövlət Məşğulluq Agentliyinin birgə təşkilatçılığı ilə həyata keçirilən layihənin məqsədi biomüxtəlifliyin qoruyucusu olan arıların ölkəmizdə arealını artırmaq, arıçılıq təsərrüfatının ekosahibkarlıq növü kimi Azərbaycanın bölgələrində yayılmasını təşviq etmək, təbii bal istehsalının təmin olunmasına dəstək vermək, gənc ailələrin maddi rifahının yaxşılaşdırılmasına töhfə vermək və gənclərin məşğulluğunu təmin etməkdir. Gənc ekosahibkarların iki il ərzində təbii artım vasitəsilə pətək saylarının çoxaldılması üçün mütəmadi olaraq təsərrüfatları mütəxəssislər tərəfindən monitorinq olunacaq və onlara lazımi məsləhətlər veriləcəkdir. Bazar iqtisadiyyatı şəraitində rəqabətə davamlı bal istehsalı mərhələsinə çatdıqda yeni arıçılara öz məhsullarını “ABAD” stendlərində sərgiləməklə geniş müştəri bazasına çıxış əldə etməyə və satışın səmərəli təşkilinə köməklik göstərilməsi planlaşdırılıb. Layihədə iştirak etmək istəyən gənclərin 10 Aprel 2024-cü il tarixinədək müraciətlərini IDEA İctimai Birliyininin qaynar xətti 1113 və ya e-mail ünvanına (info@ideacampaign.org) göndərmələri və yaxud Qəbələ Rayon Məşğulluq Mərkəzinə yaxınlaşaraq qeydiyyatdan keçməsi xahiş olunur.

04.04.2024

Albaniya prezidenti “ABAD” keramika mərkəzinin qonağı oldu

Albaniya Respublikasının Prezidenti Bayram Beqay XI Qlobal Bakı Forumu çərçivəsində Azərbaycanda işgüzar səfərdədir. O, səfər çərçivəsində Şəki şəhərini də ziyarət edib.Gəzinti zamanı prezident Beqay, Azərbaycan Respublikasının mədəniyyət naziri və Şəki Şəhər İcra Hakimiyyətinin başçısı “Yuxarı Baş” Milli Tarix-Memarlıq Qoruğunun ərazisində yerləşən “ABAD” Keramika və Tətbiqi Sənət mərkəzində də olublar.Qonağa məlumat verilib ki, mərkəzin fəaliyyətinin məqsədi ölkəmizin, əsasən də Şəkinin tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilindən hazırlanmış keramika əsərlərinin dünyada tanıdılmasıdır. Maraqlı fakt da budur ki, dünyada mövcud olan 128 gil növündən 98-nə Azərbaycanda rast gəlinir. Həmçinin bildirilib ki, Şəki şəhərinin Avropa Keramika marşrutuna daxil edilməsində mərkəzin xüsusi rolu olmuşdur.Sonda Albaniya prezidentinə Keramika və Tətbiqi Sənət mərkəzində hazırlanan xatirə hədiyyəsi təqdim olunub.

15.03.2024

“Potensial ABAD-çılara dəstək” layihəsi çərçivəsində 23 nəfərə avadanlıqla təmin olunub

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində “ABAD” (Ailə Biznesinə Asan Dəstək) publik hüquqi şəxsin birgə təşəbbüsü olan “Potensial ABAD-çılara dəstək” layihəsi icra olunmaqdadır. Layihə çərçivəsində 23 nəfər potensial “ABAD”çıya Dövlət Məşğulluq Agentliyi tərəfindən avadanlıqlar təqdim edilib. Bununla bağlı keçirilən tədbirdə Dövlət Məşğulluq Agentliyinin İdarə Heyətinin sədri Mustafa Abbasbəyli və “ABAD” publik hüquqi şəxsin direktoru Rüfət Elçiyev iştirak edib. Qurum rəhbərləri çıxış edərək layihənin mikro, kiçik və orta sahibkarlığın inkişafına, əhalinin məşğulluq səviyyəsinin artırılmasına və rəqabətqabiliyyətli ailə təsərrüfatlarının formalaşdırılmasına dəstək məqsədi daşıdığını vurğulayıblar. Bildirilib ki, qurulan mikro sahibkarlıq subyektləri bazar tələblərinin qarşılanması üçün yüksək keyfiyyətli məhsullar istehsal etmək üçün səy göstərəcək. Qeyd edək ki, layihə çərçivəsində Dövlət Məşğulluq Agentliyi tərəfindən avadanlıqlarla təmin edilmiş benefisiarlara, o cümlədən mikro sahibkarlara “ABAD” tərəfindən biznes-konsaltinq, texniki dəstək, marketinq, mühasibatlıq, hüquqi xidmətlər, logistika və satışın təşkili kimi xidmətlər göstəriləcək. Bununla da işsiz vətəndaşların məşğulluğu təmin olunaraq mikro sahibkarlar formalaşmış olacaq.

21.12.2023

“ABAD” Xəzər Rayonu sahibkarları ilə daha sıx əməkdaşlıq edəcək

19 dekabr 2023-cü il tarixində Xəzər Rayon İcra Hakimiyyətinin inzibati binasında “ABAD” mərkəzləri şəbəkəsinin genişləndirilməsinin davam etdirilməsi və iri şirkətlər tərəfindən ailə təsərrüfatlarının dəstəklənməsinin təşviqi mövzusunda iclas keçirilib.İclasda RİH başçısının I müavini Elşən Qurbanov, RİH başçısının müavini Əfsar Mirzəliyev, “ABAD” publik hüquqi şəxsin direktoru Rüfət Elçiyev, “ABAD” publik hüquqi şəxsin direktor müavini Vüsal Arzumanlı, departament müdirləri, RİH başçısı Aparatının şöbə müdirləri, rayon ərazisində fəaliyyət göstərən bələdiyyə sədrləri və digər məsul şəxslər iştirak edib.Görüşü giriş sözü ilə açan RİH başçısının I müavini sahibkarlığın inkişafı istiqamətində xalqımızın Ümummilli Lideri Heydər Əliyevin prinsip və ənənələrinin bu gün dövlət başçısı cənab İlham Əliyev tərəfindən qətiyyətlə davam etdirildiyini vurğulayaraq, ötən illər ərzində həyata keçirilən layihələr haqqında görüş iştirakçılarına məlumat verdi. Elşən Qurbanov həmçinin “ABAD” mərkəzləri şəbəkəsinin genişləndirilməsinin davam etdirilməsi və iri şirkətlər tərəfindən ailə təsərrüfatlarının dəstəklənməsinin təşviqindən də söz açdı.Görüşdə iştirak edən “ABAD” publik hüquqi şəxsin direktoru Rüfət Elçiyev bildirib ki, “ABAD”ın fəaliyyəti Azərbaycan Respublikasının sosial-iqtisadi inkişafında vətəndaşların fəal iştirakına, mikro, kiçik və orta sahibkarlığın inkişafına, əhalinin məşğulluq səviyyəsinin artırılmasına və rəqabətqabiliyyətli ailə təsərrüfatlarının formalaşdırılmasına dəstək verməyə istiqamətlənib. Bundan başqa o, görülmüş işlər və gələcəkdə nəzərdə tutulmuş layihələr haqqında geniş məlumat verib.Tədbir daha sonra qarşılıqlı fikir mübadiləsi və sual-cavab şəklində davam etdirilib.

20.12.2023

“ABAD” Mədəniyyət və Yaradıcı Sənayelər Forumunda

Mədəniyyət Nazirliyinin təşkilatçılığı keçirilən “Yaradıcı həftə” çərçivəsində 28-30 noyabr tarixlərində Heydər Əliyev Mərkəzində Mədəniyyət və Yaradıcı Sənayelər Forumu keçirilib.Forum ekosistem oyunçuları arasında qarşılıqlı əməkdaşlıq perspektivlərinin və mövcud problemlərin müzakirəsi, yaradıcı sənaye sahəsinin kompleks şəkildə inkişaf imkanlarının araşdırılması məqsədilə təşkil olunub.Forumda dövlət rəsmiləri, müvafiq qurumların nümayəndələri, mədəniyyət işçiləri və digər qonaqlar iştirak ediblər. Həmçinin onlar burada kreativ məhsulların və yaradıcı sənaye nümayəndələrinin fəaliyyətinin tanıdılması məqsədilə təşkil edilən Mədəniyyət və Yaradıcı Sənayelər Sərgisi (MY EXPO–2023) ilə tanış olublar.“ABAD” publik hüquqi şəxs bu sərgidə öz stendi ilə təmsil olunub. Forum müddətində dekorativ-tətbiqi xalq sənətkarlıq növlərindən olan, o cümlədən zərgərlik, taxta üzərində oyma, dulusçuluq, rəngkarlıq, toxuma və s. “ABAD”çı məhsulları yerli və xarici ziyarətçilər tərəfindən böyük maraqla qarşılanıb.Bundan başqa burada kino, animasiya, musiqi, “cultech” (mədəniyyət sahəsində startaplar), “gametech” (oyun texnologiyaları), dəb, dizayn, eləcə də yaradıcı məkan və regionlar sərgilənib.

01.12.2023

Azərbaycandan ilk brend “Trendyolda”

“ABAD” publik hüquqi şəxs Orta Şərq və Mərkəzi Avropanın ən böyük onlayn ticarət platforması olan “Trendyol” ilə əməkdaşlığa başlayıb. Belə ki, biznes-ekosisteminə müsbət təsir göstərmək və rəqəmsal inkişafa dəstək olmaq məqsədi ilə Türkiyədəki mikro, kiçik və orta sahibkarlıq subyektlərinin, həmçinin sənətkarların məhsul və əl işlərini Türkiyənin hər yerində, hətta digər ölkələrdə müştərilərə çatdıran platforma artıq təcrübəsini ölkəmiz ilə də paylaşacaq. Bu istiqamətdə atılan ilk addım isə "ABAD" – Ailə Biznesinə Asan Dəstək – məhsullarının platformaya daxil edilməsi oldu. “ABAD” Trendyol-da təqdim olunan ilk Azərbaycan brendi kimi Azərbaycanlı qida istehsalçılarının və sənətkarlarının əl işi məhsullarını Trendyol-dan bütün dünyaya satacaq. Hazırda pilot xarakter daşıyan bu layihə çərçivəsində kiçik miqdarda “ABAD”çı məhsulları Türkiyəyə ixrac olunub və ixrac həcminin gələcəkdə genişləndirilməsi nəzərdə tutulur. Platformada satışa təqdim olunan məhsullarımız ilə tanış olmaq üçün axtarış panelinə “ABAD” yazmağınız kifayətdir.