News

“ABAD” və “R Group Holding”in rəhbərliyi arasında görüş keçirilib

24 iyul 2024-cü il tarixində “ABAD” publik hüquqi şəxs və “R Group Holding” MMC arasında görüş keçirilib.Görüşdə Azərbaycanda fermer və aqro sahəsində satış kanallarının inkişafı ilə bağlı aktual məsələlər müzakirə edilib.“ABAD” publik hüquqi şəxsin direktoru Rüfət Elçiyev kənd təsərrüfatı sahəsində fəaliyyət göstərən sahibkarların “ABAD” sayəsində təsərrüfatlarını inkişaf etdirməklə geniş bazarlara çıxışı barədə danışıb. “R Group Holding” MMC-nin icraçı direktoru Əbdül Əliyev isə fermerlər üçün, onların məhsullarının tanıtımı məqsədi ilə şirkətin yeni texnoloji həllərini təqdim edərək, bu sahədə bazar iştirakçıları üçün daha münbit şəraitin formalaşması və satışların daha rahat şəkildə həyata keçirilməsi istiqamətində səmərəli nəticələrin əldə oluna biləcəyini qeyd edib.Bundan sonra iki qurum arasında konkret tematik məsələlər üzrə birgə layihə və təşəbbüslərin həyata keçirilməsi məqsədi ilə müvafiq müzakirələr davam etdirilib. Görüş “ABAD”çılar tərəfindən hazırlanan xatirə hədiyyəsinin təqdim olunması ilə yekunlaşıb.

25.07.2024

"ABAD" “Gənc arıçı” layihəsində uğurla iştirak edir

“Yaşıl dünya naminə həmrəylik ili” və BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən “Gənc arıçı” layihəsi Qəbələ rayonunda uğurla davam edir.Layihə IDEA İctimai Birliyi, “ABAD” publik hüquqi şəxs, Azərbaycan Respublikasının Gənclər Fondu və Dövlət Məşğulluq Agentliyinin birgə təşkilatçılığı ilə həyata keçirilir. Layihə gənclər və gənc ailələr üçün arıçılıq təsərrüfatının yaradılması və düzgün inkişaf etdirilməsinə istiqamətlənib. Layihə çərçivəsində seçilən 20 gəncə və gənc ailəyə peşəkar mütəxəssislərin iştirakı ilə bir aylıq təlim proqramı keçirilib.Təlimləri başa vuran gənclər rəsmi nümayəndələr, o cümlədən “ABAD” publik hüquqi şəxsin direktoru Rüfət Elçiyev tərəfindən sertifikatlarla təltif olunub, onlara arıçılıq təsərrüfatı üçün lazım olan arı ailələri və pətəkləri, arıçı geyimi, balsüzən aparat və digər ləvazimatlar təqdim edilib və gənc arıçılara istehsalat prosesini effektiv icra etmələri üçün lazımi şərait yaradılıb.Gənc arıçıların iki il ərzində təbii artım vasitəsilə pətək saylarının çoxaldılması üçün təsərrüfatları mütəxəssislər tərəfindən mütəmadi olaraq monitorinq ediləcək və onlara zəruri məsləhətlər veriləcəkdir. Bazar iqtisadiyyatı şəraitində rəqabətə davamlı bal istehsalı mərhələsinə çatması üçün yeni arıçılara öz məhsullarını sərgiləməklə geniş müştəri bazasına çıxış əldə etməyə və satışın səmərəli təşkilinə köməklik göstərilməsi planlaşdırılıb.Xatırladaq ki, layihə 2021-ci ildən icra olunmağa başlanıb. Layihənin məqsədi biomüxtəlifliyin qoruyucusu olan arıların ölkəmizdə arealını artırmaq, arıçılıq təsərrüfatının ekosahibkarlıq növü kimi Azərbaycanın bölgələrində yayılmasını təşviq etmək, təbii bal istehsalının təmin olunmasına dəstək vermək, gənc ailələrin maddi rifahının yaxşılaşdırılmasına töhfə vermək və gənclərin məşğulluğunu təmin etməkdir.

23.07.2024

“ABAD” sənətkarları beynəlxalq simpoziumda iştirak etdilər

Şəki “ABAD” Keramika və Tətbiqi Sənət Mərkəzinin rəssam-keramikaçıları Türkiyənin Avanos, Nevşehir bölgəsində “Heykəl və Divar keramikası” mövzusunda keçirilən 13-cü Beynəlxalq “Avanos” Tətbiqi Keramika Simpoziumunda (13UAUSS2024) iştirak ediblər. Qeyd olunan simpozium Avropa Keramika Marşurt Xəttinə üzv olan ölkələrdə keçirilən tədbirlər çərçivəsində, Nevşehir Hacı Bektaş Veli Üniversiteti, Avanos Keramika Tətbiqi və Araşdırma Mərkəzi və Avanos Bələdiyyəsinin birgə təşkilatçılığı ilə 24 iyun- 5 iyul 2024-cü il tarixlərində baş tutub. Simpoziumda Türkiyə, Rumıniya, Çin Xalq Respublikası və Yaponiya sənətçiləri ilə yanaşı, “ABAD”ın rəssam-keramikaçıları Kamran İbrahimxəlilov, Zaur Əhmədov və Asim Abbasov Azərbaycanı təmsil ediblər. Onların Şəki şəhəri və Azərbaycanda keramika sənətinin inkişafı mövzusunda təqdimatları simpozium iştirakçıları tərəfindən böyük maraqla qarşılanıb. Tədbir müddətində hazırladıqları əl işləri isə xatirə olaraq Avanos Keramika Tətbiqi və Araşdırma Mərkəzinin balansına təqdim olunub. Simpoziumun son günü isə iştirakçılar Avanosun tarixi məkanları, dulusçuluq emalatxanaları ilə tanış olub və onlar üçün Kapadokya şəhər gəzintisi təşkil olunub. Sonda simpozium iştirakçıları sertifikatlarla təltif olunublar.

08.07.2024

“ABAD”çı məhsullarının bazar əhatəsi artmaqda davam edir

“ABAD” tərəfindən dəstəklənən ailə təsərrüfatlarının məhsulları daha bir iri supermarket də satışa çıxarılıb. Belə ki, artıq “ABAD”çı ailələrin məhsullarını premium sayılan və qida çeşidi ilə seçilən “Bee Gross” marketlərindən əldə etmək mümkündür. Burada təqdim olunan böyük çeşiddə məhsullar “ABAD”çı ailə təsərrüfatları tərəfindən hazırlanıb. Məhsullar “ABAD” ın ailələr üçün formalaşdırdığı brend və dizayn altında təqdim olunur. “ABAD”çı ailələrin hazırladığı məhsullar tam təbiidir və tərkibində heç bir kimyəvi qatqı yoxdur. Bu məhsulların əksəriyyəti ailə təsərrüfatlarına “ABAD” tərəfindən təqdim olunmuş avadanlıqlardan istifadə etməklə hazırlanıb. Hər bir məhsul zəruri yoxlamalardan keçərək, müvafiq sertifikasiya şəhadətnamələri ilə təmin edilib. Ünvan: Səməd Vurğun 79A (Zabitlər parkının yanı).

05.07.2024

“ABAD” məhsulları “Oxford”da

Oksford Universitetinin Blavatnik Dövlət Məktəbinin akademik sillabusunun (tələbələrin sərbəst işinin təşkili üçün tədris-metodik proqram) tərkib hissəsi olan Beynəlxalq İqlim Danışıqları – COP29 simulyasiyası baş tutub. Tədbirdə tələbələr və heyət üçün Azərbaycanın mədəniyyətini təqdim etmək məqsədilə “ABAD”ın sənətkarları tərəfindən hazırlanmış məhsullardan ibarət guşə yaradılıb.İki gün ərzində (10-11 iyun) davam edən simulyasiyalarda iştirakçılar Azərbaycan mədəniyyəti, “ABAD” milli suvenirləri və təamları ilə yaxından tanış olublar.Təşəbbüs Oksford Universitetinin tələbəsi Ləman Əhmədova tərəfindən irəli sürülüb.

21.06.2024

“Gənc arıçı” layihəsinin təlim mərhələsinə start verilib

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə “ABAD” publik hüquqi şəxs, Azərbaycan Respublikasının Gənclər Fondu və Dövlət Məşğulluq Agentliyinin birgə təşkilatçılığı ilə həyata keçirilən “Gənc arıçı” layihəsi Qəbələ rayonunda davam edir. İlkin mərhələ olaraq “Gənc arıçı” layihəsinin seçimləri baş tutub. Layihəyə qatılmaq üçün Qəbələ və ətraf rayonlardan 50-dən çox müraciət qəbul edilib. Onlardan 39-u iştirak üçün uyğun hesab edilərək seçim mərhələsinə dəvət alıb. Seçim turunda 20 gənc layihədə iştirak hüququnu qazanaraq təlimlərə cəlb olunub. Gənc arıçılar 22 may 2024-cü il tarixindən etibarən Qəbələ rayonunda keçirilən üç mərhələdən ibarət bir aylıq təlim müddətində nəzəri və praktiki biliklər əldə edəcək, təlim müddətini tamamladıqdan sonra arıçılıq təsərrüfatı üçün lazım olan arı ailəsi və pətəkləri, arıçı geyimi, balsüzən aparat və digər lazımi ləvazimatlarla tam təchiz olunacaqlar. Növbəti mərhələdə isə iştirakçılara istehsalat prosesini effektiv icra etmələri üçün lazımi şərait yaradılaraq arı ailələrinin paylanması həyata keçiriləcək. Xatırladaq ki, IDEA İctimai Birliyinin təşəbbüsü ilə baş tutan layihənin məqsədi biomüxtəlifliyin qoruyucusu olan arıların ölkəmizdə arealını artırmaq, arıçılıq təsərrüfatının ekosahibkarlıq növü kimi Azərbaycanın bölgələrində yayılmasını təşviq etmək, təbii bal istehsalının təmin olunmasına dəstək vermək, gənc ailələrin maddi rifahının yaxşılaşdırılmasına töhfə vermək və gənclərin məşğulluğunu təmin etməkdir.